Gruaja

Për një Kosovë siç e duam të gjithë

Nënë e dy djemve të mrekullueshëm, Zoja Lleshi Berisha është kandidate e Aleancës për Ardhmërinë e Kosovës dhe thotë se ka pranuar të jetë pjesë e garës sepse vendi ynë ka nevojë për gra, që kanë dëshmuar se janë të suksesshme dhe angazhimi i tyre në politikë është i rëndësishëm. 

Foto: Artan Korenica

Zoja Lleshi-Berisha është një grua e fortë dhe e vendosur, sipas të cilës për të ecur përpara në jetë, duhet të kesh në çdo hapë në radhë të parë familjen, të punosh fort dhe t’i thërrasësh ndërgjegjes në çdo veprim. Në këto zgjedhje ajo ka vendosur të jetë pjesë e garës për deputete në Kuvendin e Kosovës, duke dëshmuar gatishmërinë për të qenë pjesë e ndryshimeve në vend.

Nënë e dy djemve të mrekullueshëm, znj. Lleshi-Berisha thotë se vendi ynë ka nevojë për gra, që kanë dëshmuar se janë të suksesshme dhe ndihet më e fortë e më e formuar për të vazhduar këtë rrugëtim tejet sfidues dhe të rëndësishëm.

“Ndihem më e fortë, më e formuar dhe garën siç po e quajmë, e kam marr me shumë sportivitet. Kam konsideruar se kemi shumë nevojë për zëra ndryshe, për gra që kanë dëshmuar sukses në profesion dhe që në garë kanë më shumë pretendime për të kontribuar në shoqëri sesa synime karriere personale! Unë dua ta fitoj garën pa dyshim, por njëkohësisht dua edhe t’i sensibilizoj gratë në përgjithësi, që sikurse jemi shtylla më e fortë e familjes dhe e shoqërisë, të kemi guximin të marrim përgjegjësitë, që mund t’i kryejmë me shumë përkushtim, ashtu siç mund ta bëjmë vetëm ne gratë!”

Megjithatë te qenët pjesë e skenës politike në vend është një përgjegjësi më vete dhe njëkohësisht një privilegj, pasi përfaqëson besimin e mijëra qytetarëve. Por nga ana tjetër dëshiron të jetë pjesë e kontributit për ndërtimin e shtetit ligjor, si një amanet i familjes së saj që ka dhënë shumë për lirinë e Kosovës.

Znj. Lleshi Berisha thotë se ashtu si çdo qytetar tjetër i pakënaqur i Kosovës, ka qenë edhe ajo vet dhe është e domosdoshme, që të ketë reformim politik e kjo nuk bëhet duke qëndruar pasiv dhe kritikuar, pa bërë përpjekje konkrete.

“Unë dua të ndryshojmë vërtetë qasjen ndaj problemeve dhe këto janë problemet e njëjta, me të cilat ballafaqohemi ne si qytetarë të një shteti të ri, që prej përfundimit të luftës! Ne kemi shumë mundësi ekonomike. Duhet të kemi arsim me kritere shumë më serioze, duhet një hapësirë dhe mbështetje e kulturës, segmenti i së cilës po na bënë krenarë kudo në botë. Kushtet nëpër kopshte, kushtet në shkolla, shtëpitë e të moshuarve, që janë prindërit tanë …. Për personat dhe familjet, që kanë anëtarë të tyre me aftësi të kufizuara dhe shumë çka tjetër duke mos e harruar kurrë mjedisin, ambientin që është sofra jonë. Ne këtu ushqehemi dhe duhet ta ruajmë e ta mbajmë sa më pastër. Janë katër vjet mandat për një deputet dhe ma merr mendja se më shumë  kemi kohë sesa angazhim, prandaj nëse punojmë vërtetë, Kosova do të jetë ashtu siç e duam të gjithë.”

Znj. Lleshi Berisha thotë se gjithmonë udhëhiqet nga prioritetet e që padyshim vendin e parë e zë familja, pastaj puna e përkushtimi në karrierë. Ky kandidim është një sfidë  dhe një mundësi për të bërë ndryshime pozitive në vend dhe këtë shpreson ta arrijë me përkushtim, por mbi të gjitha me mbështetjen dhe bashkëpunimin e qytetarëve të Kosovës.

admin

Artikujt e tjetrë